အသည်းရောင်အသားဝါဘီရောဂါပိုး ကာကွယ်ဆေးထိုးထားခြင်းရဲ့ ကောင်းကျိုးတွေကတော့ အသည်းရောင်အသားဝါဘီပိုးကြောင့်ဖြစ်တဲ့
– အသည်းရောင်၊
– အသည်းခြောက်၊
– အသည်းကင်ဆာ စတဲ့ ရောဂါတွေ မဖြစ် အောင် ကာကွယ်နိုင်ပါတယ်။
ဘယ်သူတွေ ဘီပိုးကာကွယ်ဆေး ထိုးထားသင့်သလဲ ?
-အသည်းရောင်အသားဝါဘီရောဂါပိုး ကာကွယ်ဆေးဟာ လူတိုင်း ထိုးထားသင့်တဲ့ ကာကွယ်ဆေးဖြစ်ပါတယ်။အထူးသဖြင့် ဘီပိုးကူးစက်နိုင်ခြေများသူတွေဖြစ်တဲ့
– မိသားစုထဲတွင် ဘီပိုးရှိသူများ
– သွေးနှင့် ခန္ဓာကိုယ်မှထွက်သော အရည်များကို ကိုင်တွယ်ရသူများ (ဥပမာ – ကျန်းမာရေးဝန်ထမ်းများ၊ သန့်ရှင်းရေးဝန်ထမ်းများ)
– မူးယစ်ဆေးဝါးသုံးစွဲသူများ
– အခကြေးငွေနှင့် လိင်ဆက်ဆံသူများ
– အကာအကွယ်မပါဘဲ လိင်ဆက်ဆံသူများ
– သွေးမကြာခဏသွင်းရသူများ
– ကျောက်ကပ်ဆေးနေရသူများ
– အခြားသော အသည်းရောဂါရှိသူများ
စတဲ့သူတွေမှာတော့ မဖြစ်မနေ ဘီပိုးကာကွယ်ဆေး ထိုးထားသင့်ပါတယ်။
ဘီပိုးကာကွယ်ဆေး မထိုးသင့်တဲ့သူတွေကတော့
– အသည်းရောင်အသားဝါဘီပိုးရှိသူများ
– ကာကွယ်ဆေးနှင့် မတည့်သူများ စတဲ့သူတွေကတော့ ဘီပိုးကာကွယ်ဆေး ထိုးလို့ မရပါဘူး။
ဘီပိုးကာကွယ်ဆေးကို ဘယ်နှစ်ကြိမ်၊ ဘယ်လိုထိုးရမလဲ ?
ကာကွယ်ဆေး တစ်ခါမှ မထိုးဖူးသူတွေအနေနဲ့ ဘီပိုးကာကွယ်ဆေး မထိုးမီ ဘီပိုး ရှိ၊ မရှိ စစ်ဆေးဖို့ လိုပါတယ်။ဘီပိုးမရှိတာ သေချာပြီဆိုရင်တော့ ဘီပိုးကာကွယ်ဆေးကို ၃ ကြိမ်ထိုးဖို့ လိုပါတယ်။
ဘီပိုးကာကွယ်ဆေးဟာ လက်မောင်းမှာထိုးရတဲ့ အသားဆေးအမျိုးအစားဖြစ်ပါတယ်။ ၀-၁-၆ ဆိုပြီး ဆေးထိုးရမယ့်အချိန်ကို မှတ်ထားနိုင်ပါတယ်။
ပထမလမှာ – ပထမဆုံး ၁ လုံး
နောက် ၁ လခြားပြီးနောက် – ဒုတိယ ၁ လုံး
ဆေးစထိုးတာကနေ ၆ လမြောက်မှာ – တတိယ ၁ လုံး
အားလုံးပေါင်း ၃ ကြိမ်ထိုးရမှာဖြစ်ပါတယ်။
ဆေး ၃ ကြိမ် ထိုးပြီးတာနဲ့ ဘီပိုးကို ကာကွယ်နိုင်ပြီလား ? ၊ ဆေးနောက်ထပ်ထိုးဖို့လိုသေးလား ?
– ဆေး ၃ ကြိမ်လုံး ထိုးပြီးနောက်မှာ ဆေးအောင်၊ မအောင် သိရဖို့ ဘီပိုးကိုယ်ခံအား ရှိ၊ မရှိ (Anti-HBs) စစ်ဆေးဖို့ လိုပါတယ်။
– ဘီပိုးဆေးအောင်သွားတဲ့သူတွေအနေနဲ့ နောက် ၅ နှစ်ပြည့်ချိန်မှာ အားဖြည့် Booster dose ကာကွယ်ဆေးတစ်လုံး ထပ်ထိုးဖို့ လိုပါတယ်။
– ဘီပိုးဆေးမအောင်တဲ့သူတွေမှာတော့ ကိုယ်ခံအားပမာဏ (Anti-HBs Level) ပေါ် မူတည်ပြီး ဆေးထပ်ထိုးတာ၊ ဘီပိုး ရှိ၊ မရှိ နောက်ထပ် စစ်ဆေးတာတွေလုပ်ဖို့ လိုပါတယ်။
ကိုယ်ဝန်ဆောင်မိခင်မှာ ဘီပိုးရှိတယ်ဆိုရင်တော့
မွေးလာမယ့် ကလေးကို ဘီပိုးမကူးစက်အောင် ကာကွယ်ဖို့ မွေးကင်းစ ကလေးငယ်ကို မွေးပြီးပြီးချင်း (သို့မဟုတ်) (၁၂ နာရီအတွင်း) မှာ ဘီပိုးကိုယ်ခံအားဆေး (Hepatitis B immunoglobulin) နဲ့ ဘီပိုးကာကွယ်ဆေး ၂ လုံး ထိုးဖို့ လိုပါတယ်။
နောက် ၁ လအကြာမှာ ကာကွယ်ဆေး ၁ လုံးနဲ့ ၆ လအကြာမှာ နောက်ထပ်ကာကွယ်ဆေး ၁ လုံး ထိုးဖို့ လိုပါတယ်။
ဘီပိုးဟာ ကာကွယ်လို့ရတာကြောင့် လူတိုင်း ဘီပိုးကာကွယ်ဆေး ထိုးထားကြဖို့ တိုက်တွန်းလိုပါတယ်။
Photo Credit – freepik
